PLATTRADIO – en Lüchttoorn för de plattdüütsche Spraak

In vele Huushoolden is siet en poor Maanden an’n Fröhstücksdisch mehr Plattdüütsch to hören. Snackt warrt dor nich blots över Alldagssaken, ne, ok över den Konflikt in’n Negen Oosten, so as in’n Gazastremel, de Stormfloot an de Oostsee oder de Gieselnahm an'n Hamborger Flooghaven. Vun’n 1. September af sennt PLATTRADIO maandags bet freedags vun Klock 7 bet Klock 8 op de Wellen vun den Apen Kanal Sleswig-Holsteen över relevante Schehnissen in Welt un Region. En Novum för de plattdüütsche Spraak – en grote Schangs, de ok vele Rutfödderns mit sik bringen deit.

De nedderdüütsche Medienplattform is en eerste grote Spood vun de Kampagne FUNKLOCK STOPPEN. Op uns tokamen FUNKLOCK-Onlineveranstalten in’n Novembermaand warrt de Radiomakers vun jümehr Arbeit in de Redakschoon in Kiel vertellen. Un ji as Hörers hebbt de Schangs mit jüm in’n Uttuusch to kamen. Woans gefallt jo de Sennen? Wat för Fragen hebbt ji an de Lüüd achter’t Mikro? Wat wünscht ji jo noch vun PLATTRADIO?

En Thema, dat bi PLATTRADIO bavenan steiht, dat is de Spraakutbo. Dat Plattdüütsch, wat dor bruukt warrt, ünnerscheedt sik an vele Steden wiss vun dat Platt, dat wi wennt sünd. De Redakteuren warrt vertellen, woans se de Spraak bruken doot un woans se vörgaht, wenn ne’e plattdüütsche Wöör söcht oder ole plattdüütsche Wöör wedder opleevt warrt, so as folgens, Schuul, Stietfleger, verminnern oder Verwarv.

Anmellen: info@niederdeutschsekretariat.de

De Veranstalten „PLATTRADIO – en Lüchttoorn för de plattdüütsche Spraak“ finnt statt ünner dat Dack vun de Kampagne „Funklock stoppen“: Organisatschonen ut all acht plattrelevanten Bunnslänner föddert en öffentlich-rechtlich Medium, dat vun morgens bet avends Informatschoon, Ünnerholen un Service op plattdüütsch büdd. Op de Been stellt warrt de Veranstalten vun’n Bunnsraat för Nedderdüütsch/Nedderdüütschsekretariat un den Sleswig-Holsteenschen Heimatbund.